Mane-GAUL Laran-Monu

Mane-GAUL Laran-Monu  

Alarm Telefone Apple Lian Derrepente, Liman Karuk Hakohak Nafatin Xumasu Naruk No Liman Loos Komesa Book-An Ba Leten Hodi Lamas Tuun Sa’e Buka Telefone. Manta Korderoza Ho Tipu Femenina Monu Hela Ba Rai. Hakfodak Ho Lalais Nia Tun Husi Kama Leten. Eskova-Nehan Komesa Dasa Bá Nehan-Kraik No Leten Hodi Sukit Sai Kankun Restu Hori Kalan Nian, Nia Niran Moos Ba Daudauk. Bee Hisik Dala Tolu No Sabaun Nakfurin Ba Nia, Bee Hisik Tan Dala Tolu, Toalla Halo Nia Servisu.

On  Lalais Laptop Apple Iha Meza Leten Maski Iha Kama Sorin Televizaun Ho Marka Sony Sei Lakan Nafatin. Múzika Malaiu Hatilun Ba Nia Tilun Husi Speaker Polytron Pár Rua Ne’ebé Monta Tabele Besik Pasta Backpack Iha Kuartu Sikun. Nia Hakat Pasu Tolu Bá Kotuk Hodi Loke Armáriu Roupa. Iha Armáriu Laran Naforma Hela Kalsa-Naruk Ho Brand Koñesidu: Armani, Zara, G-Start, Levis 501 No Iha Sanak Sorin Tabele Hela Kamizola Distro : Nike, Adidas, Gap, Ck, D&G No Iha Kraik Liu Iha Sapatu Keds, Boots, Zalora,Timberland No Diesel.

Sasan Hirak Ne’e Balun Mai Husi Inglaterra,Indonézia No Zero Ba Produtu Lokal.

Lalenok Hakompletu Toukadór Iha Kuartu Laran. Nia Hamriik Hodi Fihir-An Enkuantu Kose Gel Ba Nia  Fuuk Ne’ebé Tesi Horseik. Modelu Barak Mak Nia Tesi Tuir Tia Ona Husi Artista, Futebolista To’o Boyband (Selebridade). Liuliu: Devilock Emo, Spike No Skinhead. Maibé Ohin Loron Nia Prefere Liu Ho Mohawk Tanba Futebolista Baloteli.

Karik, Sira Ne’ebé Moris Iha Tinan 1990 Ba Kraik Sedauk Habelun Ho Naran Sira Ne’e Tanba Mundu Fashion Oin-Seluk Ho Klosan Ohin Loron Nian, Satán Ho Subkultura Ne’ebé Mosu Nabnaban Husi Rai Liur. Bainhira Fashion Mainstream Habelar Iha Rai Ida, Lasusar Atu Nota Klosan Nia Hatais No Modelu Fuuk. Iróniku, Klosan Halo Tuir Maibe Lahatene Katak Ida Ne’e Ambivalensia Pós-Kolonialismu.  

Ah, Ko’alia Barak Liu! Ita Hatutan Ita Nia Istória Lai. To’o Iha Ne’ebé?

Oh, Hatais Nia Roupa Lailais No Hakat Bá Han Fatin Hodi Hemu Xa,Tanba Oras Lakohi Hein Nia Husik Xa  Nanotak. Motór Vixion Mutin Hein Hela Iha Uma-Oin, Tanba Tauk Tarde Lahamanas Tan Motór Hanesan Baibain. Motór Mós Fokit Sai Hahela Suar Co2 Ba Sira Ne’ebé Halai Hela Iha Tasi-Ibun.

Bainhira Nia Xave Volante No Hasai Kapasete Motór, Hakfodak No Metin Henesan Estátua. Nian Matan-Musan  Naklosu Sai, Ibun Nakloke Maizumenus Sentímetru Rua, Lafiar Hodi Kokir Mata-Laran No Doko Ulun-Fatuk Bá Karuk No Loos. Hanesan Loos Iha Filme Kómiku. Nia Seidauk Fiar Katak Haree Buat Furak Ida. Bainhira Nia Haree Didi’ak Ho Kuidadu Dala Ida Tan, Foin Sente Katak Ne’ebá Ne’e Ema Duni, Feto Bonita Duni.

Nian Fuuk Mulatu Hodi Namkore Tun, Taka Hasan Ne’ebé Kabuar Morena. Satán, Ho Nian Inus No Hirus-Matan Ne’ebé  Idéntika Loos Ho Mia Khalifa, Nian Isin...Ai...Nian Isin, Maromak! Ó  Mak Imajina De’it Ona!

Nia Fiar-An Hodi La’o Hakbesik Bá Ai-Mahon Ne’ebé Feto-Raan Hamriik Iha Okos.

Iha Sorinsorin Estudante Sira Nunka Mais Preokupa Ba Malu, Sira Preokupa De’it Ba Tempu Ne’ebé Nakdulas. Sapatu Nian Lian, Ai-Sar Nian Lian, Motór Nian Lian, Karreta Nian Lian No Ema Nian Lian Tun No Sa’e Hodi Latuir Ton Pentatonika No Diatonika Iha Tuts Piano. Seguransa Maubere Tuur Hela Iha Portaun Hateke Metmetin Ba Jornál Loron Ohin, Dala Ruma Haluha-An Katak Nia Seguransa. Ai-Sar Tau Hamutuk Ai-Tahan Sira Husi Tiu Ida Nian Liman-Fuan Ne’ebé Belar No Forti.

Aktividade Iha Universidade Komesa Hala’o

Bainhira Harabat No Para Loos Iha Feto-Raan Ne’e Nian Oin, Halo Finje Hakru’uk Kore Sapatu-Talin Hodi Kesi Fila Fali. Feto-Raan Ne’e Hamuda Nian Matan Husi Livru Ba Sapatu-Talin, Hafoin Hamuda Fila Fali Ba Letra Iha Livru Laran. Afinál, Livru Ne’e Sai Tia Ona Katarse Ba Nian Hanoin Até Haluha Katak Nia Iha Mundu Reál. Nian Liman Karuk Ka’er Nafatin Livru No Liman-Fuan Loos Muda Neineik Hodi Loke

Pájina Foun. Karik, Nian Hanoin Hamutuk Ho Mundu Imajinasaun To’o Haluha Ema Ida Ne’ebé Kesi Hela Sapatu-Talin Iha Nian Oin.

Sapatu-Talin Mós Metin Ba Daudaun Maibé La Iha Sinál Positivu Husi Feto-Raan Ne’e. Nia Hamriik No Bá Tuur Loos Iha Banku Ai-Teka Tuan Ne’ebé Han Tinan Sanulu-Resin-Ualu Tia Ona, Durante Tempu Okupasaun Indonézia. Posisaun Banku Ne’e Iha Loos Feto-Raan Ne’e Nian Liman Loos. Maski Besik Maibé Feto-Raan Ne’e Prefere Liu Hamriik Hodi Lee.

Liman Fuan Mane-Klosan Nian Mós Muda Bá-Mai Iha Ekrán Telepone Apple Nia Leten Hodi Upload Estadu Facebook. Laoras, Nia Koko Lamas Bolsu Jeans Armani Hodi Buka Buat Ruma, Nian Zíper Pasta Mós Lian Ba Daudaun, Liman Fuan Book-An Bá-Mai Hodi Buka Buat Ida Iha Pasta Laran, Ho Kontente Nia Dada Sai Sigarru Elétriku Husi Pasta Laran. Nia  Buti Metin Hodi Supa Tama Ibun-Laran.  Suar Sigarru Elétriku Ne’e Semo Bá-Mai Hodi Mout Ho Anin. Karik, Nikotin Sigarru Bele Sai Dalan Alternativu Hodi Habrani-An Liu Tan.

Herannn..Kai, Sigarru Suar Balun Hakat Neineik Hakbesik Bá Feto-Raan Ne’e. Suar Sigarru Elétriku Sai Trand Iha Klosan Sira Nian Leet. Nian Morin No Sabór Mós Oioin Husi: Apple Fuji, Guava Sm, Vanilla French, Hudi Sm, Xokolate No Nst. Manas Ne’ebé Hetan Bomba Naksuar Sai Husi Kanu Sigarru Hodi Hafanu Feto-Raan Ne’e Nian Hanoin. Susesu! Feto-Raan Ne’e Fó Sinál Positivu. Atu Labele Haluha Nian Leitura, Feto-Raan Ne’e Marka Tadak Iha Pájina 25 Hodi Taka Nian Livru. Hakat No La’o Bá Sorin Hodi Tuur Iha Banku Tuan Nian Leten. Distnásia Entre Sira Rua, Maizumenus Metru Ida Tanba Tamañu Husi Banku Tuan  Ne’e Metru Tolu. Karik, Ne’e Momentu Di’ak Atu Hasé Feto-Raan Ne’e. Ho Kokok No Kuidadu Mane-Klosan Ne’e Foti-Oin Atu Hasé...

Telefone Lian, Kuitadu! Kala Labele Duni Tanba Mosu Tentasaun Foun Fali Ona.

Nossa Senhora! Feto-Raan Nian Lian Sensuál No Mañozu Tebtebes. Halo Adrenalina Sa’e Bainhira Rona. Se Ita Hapár Ho Selebridade Indonázia, Sira Lakon Dook! Satán Ho Selebridade Hollywood, Lakon Hotu. So, Markita Nian Lian Mak Bele Hatuur Hamutuk. Karik, Ida Ne’e Mak Domin, Buat Hotu Sai Furak Iha Nian Matan.

Ko’alia-Ko’alia Mais, Eskola Tama Tia Ona. Kolega Seluk Kala Liki Malu Ho Matéria Iha Sala Laran, Atan- Oan Iha Ne’e  Funan-Funan No Renda- Renda Hanesan Kortina Verde Ne’ebé Tara Iha Janela Sorin.

Maibé Se Haree Mane-Klosan Ne’e Nian Istória Domin , Differente Tebes Ho Istória Domin Aida Belo Nian,  ...Istória Domin Ne’e...Hau Sei Lahaluha...  Agora, Mane-Klosan Ne’e Nian Istória Domin   ...Cinta Satu Malam...Oh! Indahnya... Maibé, Keta Sala!  Melinda, Kantóra Indonézia Ne’e Rasik Halo Plájiu Múzika Cinta Satu Malam Husi Kantóra Alemaña Cascada Ho Títulu Orijinál Everytime We Touch. Karik Ida Ne’e Mak Obra Ohin Loron Nian Ne’ebé Nian Hun Husi Orijinalidade Sai Pergunta.

Hakarak Hatete Katak, Kuaze Feto Bonita Barak Mak Monu Tia Ona Iha Nian Hakohak, Husi Fuuk Naruk,Badak,Mulatu,Balanda,Mean, Loiru Até Fuuk Mutin. Maibé Atu Na’ok Feto-Raan Ida Ne’e Nia Laran La Instante Hanesan Junk Food (Supermi). Tanba Sá...?  Atu Fihir Deit Feto Ida Ne’e Nian Matan Kusta Tebtebes Hanesan Kura Moras Kusta (Lepra), Laran Mós La Hakmatek, Fuan Tuku-Tuku Hanesan Hetan Aperkat Karuk Husi Mike Tyson. Oh, Satanas! Malirin Kahur Manas To’o Nia Isin Manas.

Nia Sente Emosaun Hirak Ne’e Bainhira Taka Matan, Maibé Saida Mak Akontese Bainhira Loke Matan, Nein Fuuk Lahan Ida La Iha Ne’ebá, Maibé Iha Nukleu Rohan La’ek Ida Mak-Feto Raan Ne’e Husik Iha Banku Tuan Nian Leten.  Ho Kuriozu Nia Foti Livru Ne’ebé Latan Hela, Nian Kapa Hakerek Ho Letra Maiúskula ‘Klosan Ho Kultura Pop’.  Ó Mate Ga Lae!